Driver sang motorsiklo patay sang nakabunggo sa nagapundo nga awto sa Zarraga
ILOILO — Patay ang driver sang motorsiklo sang nakabunggo sa awto sa Brgy. Sigangao, Zarraga las-10:30 sang gab-i sang Enero 4.
Suno kay Police Captain Dandy Ilalto, Officer-in-Charge sang Zarraga Municipal Police Station, halin sa Pototan kag padulong sa Iloilo City ang awto sang nabungguan sang motorsiklo ang likod nga porsyon sang salakyan.
Base sa pagpangusisa sang police, naga-hazard ang awto tungod may natumba nga motorsiklo sa unahan kag nagatuyo ang driver nga buligan ang driver sang amo nga motorsiklo.
Gulpi lang suno sa police, nakabunggo ang isa pa ka motorsiklo sa likod nga porsyon sang salakyan.
Una nga nasalapay sang motorsiklo ang mga signages nga ginpahamtang sang DPWH sa gina-obra nga karsada antes nakabunggo sa awto, suno sa police.
Nakaagum sang pilas sa ulo ang driver sang motorsiklo nga wala sang suksok nga helmet. Gindala pa siya sa ospital sa Barotac Nuevo apang gindeklarar nga dead-on-arrival, suno sa police.
Ginkilala ang driver sang motorsiklo kay Jovanie Abogadil, 31-anyos sang Brgy. Pasil, New Lucena, Iloilo.
Ginkilala naman kay Rodney Oscares, Jr. sang Brgy. Cansilayan, Dumangas ang driver sang awto.
Gin-custody naman ang driver sang awto sa Zarraga Municipal Police Station. — ARI Trainee reporter Ivan Villa
