Ticket para sa Dinagyang Tribe Competition sold out na
ILOILO CITY — Sold out na ang tickets para sa Dagyang Tribes Competition nga isa sa mga highlights sang Dinagyang Festival 2025.
Suno kay Ms. Joyce Clavecillas, executive director sang Iloilo Festivals Foundation Incorporated, madasig ang baklanay sang tickets sa online nga www.dinagyangtickets.com.
Ang tickets para sa Kasadyahan sa Kabanwahanan na lang suno kay Clavecillas, ang mabakal sa nasambit nga website.
Subong nga tuig lang gin-implementar nga mabakal sa online ang tickets para sa Dinagyang Festival. Sa Enero 25 ang Kasadyahan sa Kabanwahanan, samtang sa Enero 26 ang Dagyang Tribes Competition.
Samtang, ginpaathag ni Clavecillas nga ang Iloilo City Government ang nagplastar sang mga judging areas para sa mga competition sa Dinagyang Festival.
Ginpahayag niya nga madamo ang ginapaabot nga bisita sa Dinagyang Festival subong nga tuig rason nga ang Quezon-Ledesma kag Mabini-Delgado nga judging areas lang ang nasakop sa tickets.
Magluwas diri, ma-perform man ang mga competing tribes sa Iloilo Freedom Grandstand kag Iloilo Provincial Capitol nga ginapaabot dugukan sang mga bisita. — IFFI
