18 ka mga balay nasunog sa Rizal Lapuz; Bedridden nga babaye patay sang na-trap sa nagakasunog nga balay

ILOILO CITY — Ginpuhag ang mga residente sa Rizal Lapuz sang nagluntad nga daku nga sunog kahapon.   

Nabudlayan pa ang mga bombero sa pagsulod sa area tungod sa makitid nga dalan rason nga nagsaka sila sa atop sang malapit nga mga bodega agud mapalong ang nagakasunog nga mga balay.

 Suno sa residente alyas Ging-Ging, nagapanglaba siya sang gulpi lang niya natalupangdan nga naga-aso na ang balay sang iya pakaisa nga iping sang ila balay rason nga nagpangayo siya sang bulig//   Pero nagdaku na ang kalayo kag naglaton sa ila balay.

 Nagahilibiun si Ging-Ging tungod wala gid siya sang may nasalbar nga gamit halin sa ila balay.

Tatlo ka mga senior citizens ang gin-report nga naglain ang pamatyag tungod sa kakulba sa nagluntad nga sunog pero gilayon man sila ginhatagan sang first aid.

La-1:30 sang hapon sang gindeklarar sang mga bombero nga under control ang sunog.        

Base sa data sang City Social Welfare and Development Office, 16 ka mga balay ang natupok gid sang kalayo, samtang duha ang partially-damaged. 31 ka mga pamilya ang apektado sang sunog kag temporaryo nga nagatiner sa mga evacuation centers.

P1.2 million ang ginbilin nga kahalitan sang sunog.

Naga-isahanon lang nga nabilin sa sulod sang balay ang 68-anyos nga bedridden nga babaye nga napatay sang nagluntad ang sunog kahapon.

Suno kay Mrs. Emily Jaruda, tiya sang napatay nga si Susan Aycona, wala siya sa ila balay tungod nagaplastar siya sang inugbaligya nga inasal. Nagakatulog si Susan sa iya kwarto sang nagluntad ang sunog.

Sang nahibaluan ni Jaruda nga may sunog malapit sa ila balay, gilayon siya nga nagdali-dali agud mahingagaw pa guwa ang iya hinablos kag makasalbar sang mga kagamitan kag mga dokumento pero madasig nga naglapta ang kalayo.

Ang nasuksok lang nga panapton ang nasalbar sang pamilya ni Jaruda.

Ginpabutiyag pa ni Jaruda nga may naghambal man sa iya nga residente nga may nagsalbar sa iya hinablos pero sang ginpangita nila, natukiban nga lain nga tigulang ang natabangan kag wala napaguwa sa sulod sang balay si Susan.

Sa data sang City Social Welfare and Development Office 18 ka mga balay ang nasunog. Temporaryo nga nagatiner sa Jalandoni Memorial Elementary School ang mga nasunugan.