64-anyos nga pastor patay sang gintiro sa sulod sang iya salakyan sa Pavia
ILOILO — Patal nga pilas sa ulo ang naagum sang 64-anyos nga pastor sang gintiro sa sulod sang iya salakyan sa Brgy. Anilao, Pavia kagab-i, Enero 10.
Ginapatihan sang Pavia police nga kaupod ni Douglas Jover, sang Brgy. Quintin Salas, Jaro sa sulod sang salakyan ang suspetsado.
May pilas sang pagkatiro sa tuo nga parte sang ulo ang biktima nga naglapos sa iya sag-ang. Tungod sini, nagapati ang police nga yara sa backseat sang salakyan ang suspetsado. May nakita nga 45 caliber pistol sa backseat sang salakyan.
Una na nga ginpahayag ni Alyas Teray nga residente sa Anilao, Pavia, nakabati sila sang asud-asod nga lupok sang pusil antes nakit-an ang salakyan nga nagbunggo sa kudal sa kilid sang karsada.
Naabtan ang biktima nga may pilas sang pagkatiro nga nagadunglay sa driver’s seat sang salakyan.
Gindala pa siya sa ospital pero gindeklarar nga dead-on-arrival. Suno kay Police Lieutenant Gabriel Maguera, deputy chief sang Pavia Municipal Police Station, may nakakita nga nagsakay sa motorsiklo matapos nga nagpanaog sa salakyan ang nagtiro kay Jover kag nagpalagyo.
May nagamaneho sang motorsiklo kag nag-angkas ang suspetsado. Gina-check na sang Pavia police ang CCTV cameras.
Nagpalagyo ang mga suspetsado sa direksyon padulong sa Leganes ukon Jaro, Iloilo City. — Aksyon Maria Kayla Tingzon
