7 ka salakyan nagkarambola sa Dumangas

ILOILO — Pito ka mga salakyan ang nagkarambola sa Brgy. Balabag, Dumangas pasado las-2:40 sang hapon kahapon, Enero 12.

Suno kay Police Staff Sergeant John Mark Tuazon, imbestigador sang Dumangas Municipal Police Station, naga-convoy sa pagdul-ong kay the late Estancia Mayor Rene Cordero pakadto sa Iloilo City ang anum ka salakyan nga involved.

Sa imbestigasyon sang police, may salakyan nga naga-convoy nga gulpi nagdulog rason nagpondo ang nagasunod nga Toyota Hilux pick-up.

Tungod gulpi nga nag-full-stop ang pick-up, nagbunggo sa likod sini ang Isuzu Crosswind kag Mitsubishi Xpander nga indi kabahin sang convoy.

Nakabunggo man sa likod ang mga nagasunod pa nga salakyan.

Wala sang may napilasan sa aksidente pero naglain ang pamatyag sang mga sakay sang isa ka salakyan tungod sa impact.

Naka-istoryahanay na ang mga drivers sa pagpakay-o sang mga na-damage nga salakyan. — Aksyon Paula Elambayo