Driver sang pick up nga nag-arado sang stalls sang mga nagabaligya sang bingka sa Jaro nakuhaan sang mga pusil
ILOILO CITY — Gin-arado sang pick-up ang mga stalls sang baligyaan sang bingka sa atubang sang Jaro Plaza las-12:40 kaina sang kaagahon.
Suno kay Police Captain Gimel Acuesta, Officer in Charge sang Iloilo City Police Station 9, halin sa Jaro kag padulong sa La Paz ang direksyon sang driver nga si alyas RA 41-anyos sang Bankers Village, Brgy. Tabuc Suba, Jaro sang natabu ang insidente.
Base sa pagpangusisa sang pulis, napiyungan ang driver rason nga nagdiri-diretso kag gin-arado ang duha ka mga baligyaan sang bibingka. Nadalahig ang tatlo ka mga indibidwal nga nakaagum sang menor nga mga pilas sa pag-arado sang pick-up suno sa pulis.
Sang ginpapanaug sang mga pulis ang driver sa iya salakyan, nakit-an ang isa ka rifle sa iya tuo nga paa kag natapik malapit sa kambiyada sang salakyan nga may walo ka magazine kag 251 ka mga bala.
Samtang, na-recover sa backseat sang salakyan ang isa ka Smith & Wesson Springfield nga may isa ka magazine kag may walo ka mga bala, isa ka Smith & Wesson Hilton Springfield nga may isa ka magazine kag walo ka mga bala kag isa ka armalite M1582 nga may walo ka magazine kag 251 ka mga bala.
Wala sang may napakita nga nagakaigo nga mga dokumento ang driver sang pick-up suno sa pulis.
Nagsugod as-12:01 kaina sang kaagahon ang pagpatuman sang gun ban sang Commission on Elections (COMELEC).
Nagpamalibad na maghatag sang pahayag ang driver sang pick-up nga yara na sa kustodiya sang Iloilo City Police Station 9. — ARI Trainee reporter Ivan John Villa
