Persons of interest sa pagpatay kay Pastor Douglas Jover sa Pavia na-capture sa CCTV camera

Na-capture sa CCTV camera ang tatlo ka mga persons of interest sa pagpatay kay Pastor Douglas Jover sa Anilao, Pavia antes ang insidente sang Enero 10 sang gab-i.

Suno kay Police Major Harold Rendora, hepe sang Pavia Municipal Police Station, nag-standby sa Barangay Pagsangaan ang tatlo ka mga persons of interest nga lunsay nakasuksok sang helmet.

Base sa footage, may duha ka mga motorsiklo nga naka-standby sa amo nga lugar, duha ang sakay sa isa ka motorsiklo kag isa ang nagapungko sa isa pa ka motor. Ang angkas sa isa ka motor amo ang gintudlo sang mga testigo nga gunman.

May CCTV camera man nga naka-capture nga nagpondo sa Pagsangaan-Anilao Bridge ang salakyan sang pastor nga amo ang ginalantaw sang police nga lugar sa diin nagsakay ang gunman. Ginabanta nga 500 meters ang kalayuon sang taytay sa lugar sa diin nakita nga naga-standby ang tatlo ka persons of interest.

Indi makita ang pagsakay sang gunman tungod malayo kag low quality ang CCTV camera kag madulom ang lugar.

Sa pag-assess ni Rendora, halin sa taytay mga 30 segundos lang ang travel time kag makalab-ut sa crime scene. Pero nagaguwa sa ila imbestigasyon nga naglab-ut sa isa ka minuto kag 41 segundos ang biyahe sang salakyan sang biktima tubtob nakalab-ut sa crime scene.

Matapos ang krimen, nakita sa isa pa ka footage ang tatlo ka persons of interest nga nagasakay sa isa lang ka motorsiklo pabalik sa junction sang Barangay Pagsangaan kag pakadto sa direksyon sang Tigum, Pavia.

Una na nga ginpahayag ni Major Rendora nga may witnesses nga nakakita sa mga persons of interest, ilabe na sa gunman sang nagguwa sa salakyan sang pastor pagkatapos sang mga lupok. — Aksyon Maria Kayla Tingzon