Utang ginalantaw nga motibo sa pagpatay kay Pastor Douglas Jover sa Pavia
ILOILO — Ginalantaw nga utang ang motibo sa pagpatay sa pastor sa Anilao, Pavia sang Enero 10 sang gab-i.
Suno kay Police Major Harold Rendora, hepe sang Pavia Municipal Police Station, nakita sa cellphone ni Pastor Douglas Jover nga may transaksyon siya sa cryptocurrency ukon online trading.
Dugang niya, nakita man sa salakyan sang pastor nga may mga ebidensiya nga acknowledgement receipt, withdrawal kag deposit slip rason nga ginalantaw ang posibilidad nga may gin-utangan siya para maka-invest sa cryptocurrency.
Ginpabutyag man ni Rendora nga kun basehan ang obra sang biktima bilang veterinarian kag pastor, husto lang ang iya income sa pang-adlaw-adlaw nila sang iya pamilya kag may salakyan pa siya nga ginabayran bulanan.
Sa pagpangusisa sang police sa asawa sang biktima, wala sang ginakaptan nga daku nga kantidad sang kwarta ang iya bana.
Indi pa ma-establisar sang kapulisan kun ang nagpatay sa biktima amo ang gin-utangan niya ukon ginsugo lang. — Aksyon Maria Kayla Tingzon