Pastor Douglas Jover nga ginpatay sa Pavia nakasugid sa iya abyan nga may pamahog siya sa kabuhi; Salakyan sang biktima gintuyo pa kuntani ipalagyo sang suspek suno sa police
ILOILO — Ginsugid sang abyan ni Pastor Douglas Jover nga may pamahog sa kabuhi ang biktima antes siya ginpatay sa sulod sang iya salakyan sang gab-I sang Enero 10.
Suno sa exclusive interview sang Aksyon Radyo Iloilo kay alyas Johnny, makapila ka beses nga nakapanugid si Jover sa iya nga may mga nabaton siya pinaagi sa text message nga mga pamahog sa iya kabuhi.
Wala ginsapak ni Jover ang pamahog pero nagpangayo siya sang bulig para sa iya seguridad paagi sa pagpangamuyo. Wala ginhambal ni Johnny kun ano nga pamahog ang nabaton ni Jover.
Aga sang Enero 10 sang magkaupod sila ni Jover, may nabatian siya nga may naga-text kag nagapanawag sa iya nga lalaki. Nagapati si Johnny nga aga pa lang sang amo nga petsa, gina-surveillance na si Jover.
Sa latest nga investigation sang Pavia Police, utang ang mabaskog nga anggulo nga ila ginasundan sa pagpatay kay Jover. May mga ebidensya suno kay PMajor Harold Rendora, Chief-of-Police sang Pavia nga nagatudlo sa anggulo – cellphone ni Jover nga may transaksyon siya sa cryptocurrency ukon online trading.
Gintuyo pa kuntani ipalagyo sang suspek ang salakyan ni Jover.
Suno kay Police Lieutenant Gabriel Manguera, deputy chief sang Pavia Municipal Police Station, may witness nga nagpadulong sa estasyon kag ginsaysay nga ginpungkuan pa sang lalaki ang lawas sang pastor nga yara sa driver’s seat agud i-manehar ang salakyan.
Wala na nagpana-og ang lalaki kundi naglaktod na lang sa espasiyo sa tunga sang passenger kag driver’s seat agud makasaylo sa likod kag nagguwa sa tuo nga pwertahan sa backseat.
Ginalantaw sang police nga wala nadayon ang plano sang lalaki tungod high-tech na ang mga pilindutan sang salakyan kag indi siya makahibalo.
Sa pagpangusisa sang police sa nakakita, amat-amat na nga nagadamo ang tawo pero nagapangalihid lang sila tungod sa kakulba kag may nagtawag naman sang police. Una na nga ginpahayag sang Pavia police nga utang ang ginasundan nga anggulo kag may yara na sila sang persons of interest. — Aksyon Cedrick Anona
