Suspek sa pagpatay kay Pastor Douglas Jover sa Pavia foreign national — pulis
ILOILO — Foreign national ang suspek sa pagpatay kay Pastor Douglas Jover sa sulod sang iya salakyan sa Brgy. Anilao, Pavia sang Enero 10 sang gab-i.
Suno kay Police Lieutenant Gabriel Manguera, deputy chief of police sang Pavia Municipal Police Station, may nagkadto sa ila nga mga testigo agud boluntaryo nga maghatag sang panaysayon parte sa ila nahibaluan sa krimen kag pagtudlo sa mga suspetsado.
Tatlo ang persons of interest sang Pavia police sa krimen.
Una na nga ginpahayag ni Manguera nga utang ang nagapanguna nga motibo sa krimen ang ila ginasundan.
Sa tiun nga makumpleto na ang Pavia police ang mga dokumento posible nga mapasakaan sang kaso ang mga suspetsado sa masunod nga semana.
PUSIL NGA NA-RECOVER SA SULOD SANG SALAKYAN GINGAMIT SA PAGPATAY SA PASTOR
Nag-match sa na-recover nga pusil sa sulod sang salakyan sang biktima na-recover nga bala sang 45 kalibre nga pusil base sa resulta sang ballistic examination.
Suno kay Lieutenant Manguera, unlicensed ang pusil kag ginapatihan nga ginapanag-iyahan sang gunman.
Wala man nakapalupok sang pusil ang biktima base sa resulta sang paraffin test nga gin-conduct sang crime laboratory sa Police Regional Office 6.
Sa imbestigasyon sang police, may pito ka mga bala ang magazine sang calibre 45, apat ang napalupok, may isa ka nagsangal, may isa sa chamber load kag isa ang nabilin sa magazine sang pusil.
Sa dugang nga pagpangusisa sang Pavia police, wala sang lisensyado nga pusil si Jover.
Sa subong, may tatlo ka persons-of-interests nga ginasundan sang police pinaagi sa mga testigo nga nagkadto sa Pavia Police station agud maghatag sang boluntaryo nga statements may kaangtanan sa pagpatay sa biktima. — Aksyon Cedrick Anona
