Honest taxi driver nga nagbalik sang bag sang pasahero nga may unod nga P2.4M nakabaton sang reward halin kay 2nd District Cong. Michael Gorriceta

ILOILO — Nakabaton sang cash reward nga P30,000 halin sa opisina ni 2nd District Congressman Michael Gorriceta ang honest taxi driver nga nagbalik sang bag sang iya pasahero nga may unod nga P2.4 million.

Tumandok sang Brgy. Amparo, Pavia si Anthony Aguirre.

Si Dr. Kathy Gorriceta nga asawa ni Congressman Gorriceta ang personal nga naghatag sang cash reward sang nagpadulong si Aguirre sa opisina sang kongresista kaupod ang taxi unit owner sang A&A Marie Taxi nga si Aldrina Janobas.

“Isa ini ka ehemplo nga mangibabaw gid ang kaayuhan sa kalibutan kag kun ikaw naga-ubra sang ensakto kag mabuot ang tagipusu-on, magabalik ang kaayuhan sa imo. Kabay pa nga madamo pa ang ma tandog ang balatyagon sa gin-ubra ni Mr. Aguirre kag madugangan ang mga honest and good samaritan sa Segundo Distrito,” suno sa Facebook post ni Congressman Gorriceta.

Sang Enero 17, ginbalik ni Aguirre sa police station sa siyudad ang bag sang iya pasahero nga nag-ani sang pagdayaw halin sa publiko.