Pila ka lighted festivals sa bilog nga pungsod mapasundayag sa ILOmination Streetdance Competition sang Dinagyang Festival 2025
Ginabantayan na sang mga Ilonggo ang ILOmination Streetdance Competition and Floats Parade of Lights, isa sa mga sidelights sang Dinagyang Festival 2025, nga hiwaton sa Biyernes sang gab-i, Enero 24.
Ang mga competing tribes, maparada halin sa Atria Park District padulong sa SM City Iloilo sa diin sila ma-perform, kag madiretso sa Iloilo Business Park sa Mandurriao.
Nagpang-agda si Mayor Jerry Treñas nga saksihan ang nasambit nga kompetisyon nga bukas sa publiko.
Matingub sa ILOmination ang pila ka mga lighted festivals sa bug-os nga pungsod agud mag-perform kag magadugang sang kasanag sa selebrasyon.
Lakip sa mapasakop ang Bailes de Luces sang La Castellana, Negros Occidental, Puvvurulun Affi Festival sang Tuguegarao City, Cagayan, Tanglawan Festival sang San Jose del Monte, Bulacan, kag Pandang Gitab Festival sang Oriental Mindoro.
Ini na ang ikatatlo ka tuig nga ginahiwat ang ILOmination Streetdance Competition nga ginapasakupan sang mga tribu kag Floats Parade of Lights nga ginapasakupan naman sang pila ka mga pribado nga kompaniya.
