Bangkay sang lalaki nga nasulod sa sako nasapwan sa Parola Wharf
ILOILO CITY — Ginburambudan sang cyclone wire kag ginbutangan sang mga bato kag hollow block ang nasapwan nga bangkay sang lalaki nga nasulod sa sako sa parola Wharf kahapon, Enero 26.
Suno sa mga nakakita, natalupangdan nila ang sako nga may dugo kag nagapanimaho rason nga gin-report sa kapulisan.
Sang nagresponder ang Scene of the Crime Operatives ukon SOCO, ginbuksan ang sako kag nakita ang bangkay sang lalaki nga yara na sa advanced state of decomposition. Ginpatihan sang kapulisan nga tatlo ka adlaw na sa tubig ang bangkay.
Ginkilala sang iya utod ang lalaki nga taga-Antique. Suno sa utod, nakahibalo siya nga makadto sa Iloilo ang biktima pero wala siya nakahibalo sang rason.
Sa impormasyon nga nakuha sang Aksyon Radyo Iloilo, Enero 22, 2025 nagkadto sa Iloilo City ang lalaki.
Nag-ayo ang pamilya nga indi lang pag-i-post ang ngalan sang biktima.
Gina-imbestigaran sang pulis kun ano ang matuod nga natabo sa lalaki. — Aksyon Maria Kayla Tingzon