Former Iloilo City Mayor Jed Patrick Mabilog nahatagan sang executive clemency
Nagpagguwa sang resolution ang Malakanyang nga nagahatag sang executive clemency kay former Iloilo City Mayor Jed Patrick Mabilog.
Ginpirmahan ni Executive Secretary Lucas Bersamin ang executive clemency sang Enero 15 subong nga tuig.
BACKGROUND
Duha ka kaso administratibo ang ginpasaka kay Mabilog sang siya pa ang alkalde —ang kaso may kaangtanan sa wala mapa-athag nga manggad ni Mabilog nga gin-file ni former Provincial Administrator Manuel Mejorada sang 2014, kag ang graft case may kaangtanan sa clamping business nga gin-file gihapon ni Mejorada.
Agosto 29, 2017 sang nagpaguwa ang Ombudsman sang dismissal order kay Mabilog kag nag-disqualify sa iya sa pag-uyat sang ano man nga opisina sa gobyerno tungod sa una nga kaso. Pero ginbaliskad ini sang Court of Appeals nga desisyon sang Hunyo 11, 2021 nga nag-abswelto kay Mabilog sa kaso.
Sang 2023, nag-file ang Ombudsman sang kaso kriminal kay Mabilog sa pagsulod sa memorandum of agreement upod sa 3L Towing Services sang Enero 2015 sa clamping kag towing sang mga illegally-parked nga salakyan sa syudad. Suno sa Ombudsman, si Mabilog ang tag-iya sang 3L kag dummy owner lang si Leny Garcia.
Sang 2017 nagbiya sa Pilipinas si Mabilog kag iya pamilya sang gin-angut siya ni former President Rodrigo Duterte sa illegal drugs bilang drug protector.
Septiyembre 10, 2024 sang nagbalik sa Pilipinas si Mabilog kag nag-surrender sa NBI agud atubangon ang kaso sa Sandiganbayan. Nakapiyansa siya kag na-release pagkasunod nga adlaw.
Septiyembre 20, 2024 nag-file sang petition sa Office of the President ang anay alkalde nga nagahingyo nga dulaon ang iya administrative penalties nga ginpapanaug sa iya sang Sandiganbayan
“WALA NAGAKAHULUGAN NGA WALA SIYA SANG SALA”
Wala nagakahulugan nga wala na sang sala si former Mayor Mabilog tungod nahatagan siya sang executive clemency sa kaso administratibo nga gin-file batok sa iya.
Ini tungod lain ang kriminal nga kaso sang sa administrative case.
Ginpaathag ni Atty. Eldrid Antiquiera nga wala sang epekto sa criminal case sang anay alkalde ang presidential pardon.
Magapadayon suno sa iya ang pending nga kaso criminal ni Mabilog sa Sandiganbayan kag igapresentar diri ang mga ebidensya.
Una na ginpahayag ni Antiquiera nga isa sa mga requisites sang pardon, amo ang conviction sa criminal ukon administrative cases.
