Pagpasar sang resolution nga naga-demand sang apology kay JK Labajo i-suhestyun ni Councilor Ely Estante sa konseho
ILOILO CITY– I-suhestiyon ni Iloilo City Councilor Ely Estante sa session sang Sangguniang Panlungsod buwas, Enero 30, nga magpasar sang resolusyon nga naga-demand sa singer/artist nga si Juan Karlos Labajo sang apology.
Ini may kaangtanan sa paggamit sang pamuyayaw nga tinaga sa iya nga performance sa product-sponsored concert nga kabahin sang side events sang Dinagyang Festival 2025 sa Iloilo Business Park sang Enero 24.
Dugang pa ni Estante, masuhestiyon man siya sa city council nga obligaron ang Iloilo Festivals Foundation, Inc. (IFFI) nga maghimo sang mga pagsulundan para sa mga artista lakip na sa ila nga mga organizers nga mahimo sang concert ukon iban pa nga event sa mga kapistahan sa siyudad.
Ginpabutyag ni Coun. Estante nga dapat sang nagligad pa lang nga tuig natun-an na sang IFFI ang natabo sa 100-days countdown para sa Dinagyang Festival 2024 kun diin nagpamuyayaw man ang gin-imbitar nila nga social media influencer sa atubangan pa sang mga pari.
Una na nga nagpaguwa sang disgusto si Coun. Alan Zaldivar sa natabo nga concert kag nagpabutyag nga ma-deliver sang privilege speech para sa session subong nga adlaw. — Aksyon Marvin Malificiar