Masobra tunga sa milyon ka pesos nga balor sang illegal drugs nasulod sa bag nga gin-turn over sang concerned citizen sa Molo
ILOILO CITY — Ginkumpirmar ni Police Captain Ryan Christ Inot, officer-in-charge sang Police Station 4 sa Molo, nga illegal drugs ang unod sang bag nga ginturn-over sang concerned citizen sa Brgy. Compania, Molo sang Pebrero 5 sang gab-i.
Suno kay Inot, may barangay kagawad nga nagtawag sa ila kag nagpahibalo nga may ginturn-over nga bag sa ila.
Ginpahayag ni Inot nga ginbuksan sang barangay officials ang bag kag nakit-an ang pinutos sang illegal drugs.
Una nga nagpangayo sang bulig ang kagawad sa ila residente nga police operative sang Molo police.
Yara sa 16 ka sachet sang illegal drugs kag isa ka digital weighing scale ang nakuha sa bag.
Nagabalor sang P554,000 ang nakuha nga illegal drugs suno sa police. — Aksyon Paula Elambayo
