P1.8 million nga balor sang suspected shabu na-recover sa drug buy bust sa Oton

ILOILO — Naglab-ut sa P1,802,000 ang balor sang suspected shabu nga na-recover sa buy bust operation sang Provincial Drug Enforcement Unit (PDEU) sa Brgy. Poblacion South, Oton pasado sang Pebrero 8.

Sa tatlo ka mga nadakpan, duha ang main target nga amo sanday alyas Wild, 50-anyos taga- Brgy. San Antonio, Oton kag alyas Ariel, 50-anyos taga-Poblacion South, Oton kag ginakabig sang police nga high value drug personality.

Dakop man si alyas Ryan, 47-anyos sang Brgy. Poblacion South, Oton kag street level individual suno sa police.

Suno kay Police Major Dadje Delima, head sang PDEU nagdugay sang tatlo ka bulan ang monitoring sa duha antes nadakpan.

Sa pagpangusisa sang police, sa Brgy. Bakhaw, Mandurriao ginakuha sang mga subject ang supply sang illegal drugs.

Nagabug-at sang ginabanta 265 grams ang suspected shabu nga na-recover sa operasyon. — Aksyon Paula Elambayo