4 sa 5 ka solterito nga nakapalagyo sa Balay Dalayunan kag nagpang-hold up sa babaye sa City Proper na-rescue sang kapulisan
ILOILO CITY — Na-rescue sang kapulisan ang apat sa lima ka mga children conflict with the law (CICL) nga nakapalagyo sa Balay Dalayunan sa Lapuz mga las-dos kahapon sang kaagahon, Pebrero 10.
Ini sang ginreklamo ang apat sang pagpanghold-up sa City Proper.
Suno sa reliable source sang Aksyon Radyo Iloilo, natabo ang pagpanghold-up sang nagalakat ang babaye kaupod ang iya ido sa Esplanade sa Quirino Bridge nga sakop sang Brgy. President Roxas, City Proper pasado las-singko sang kaagahon.
Gulpi lang ginbutong sang duha ka solterito ang sling bag nga dala niya. Natumba ang babaye nga nakaagum sang gasgas sa tuhod. Nataban sang mga solterito ang P500 nga cash kag iPhone 15 nga cellphone sang biktima.
Pasado las-7:30 na sang aga sang nag-report sa police station ang biktima.
Gilayon nga nag-conduct sang imbestigasyon ang kapulisan kag nagtipon sang CCTV footages.
May ginpakita sa biktima ang kapulisan nga litrato sang mga menor-de-edad kag iya nga gintudlo nga nag-hold up sa iya.
Ginpadulungan sang kapulisan ang mga barangay kun diin nagatiner ang mga solterito rason nga na-rescue sila.
Sang ginpa-atubang sa biktima, positibo sila nga gintudlo sang babaye nga nagpanghold-up.
Padayon naman nga ginapangita sang kapulisan ang isa pa ka solterito nga nakapalagyo. — Aksyon Paula Elambayo
