16-anyos nga lalaki patay na sang nasapwan sa punungan sa Dumangas

ILOILO — Patay na sang nasapwan ang 16-anyos nga solterito sang nalumos sa punungan sa Sitio Umba, Barangay Bacay, Dumangas kahapon sang aga, Pebrero 11.

Suno kay Police Executive Master Sergeant Kim John Banzon sang Dumangas Municipal Police Station, kaupod sang solterito nga nagabantay sa punungan ang iya amay.

Sa imbestigasyon sang police, nag-inum-inom sa kamalig ang mag-amay upod ang iya kumpare sang gab-i. Pero naglakat ang magkumpare kag nabilin ang solterito tungod gintugyanan siya sang iya amay nga bantayan ang trampahan sang punungan.

Pasado las-10:00 sang gab-i sang nakabalik ang amay kag kumpare sa kamalig pero natingala sila nga wala pa makabalik sa ila ginatineran ang solterito.

Ginpangita sang amay ang iya bata pero mabaskog ang daludo sang tubig sa punungan rason nga nabudlayan siya sa pagpangita.

Kaina sang aga sang nasapwan ang bangkay sang solterito sa punungan.

Suno kay Banzon, posible nga nakadanlog ang solterito kag nahulog sa punungan rason nga nalumos. — Aksyon Paula Elambayo