Grand rally sang Alyansa para sa Bagong Pilipinas sa Iloilo City ginapaabot nga tambungan sang 40,000 tubtob 50,000 ka supporters

ILOILO CITY—Ginapaabot sa 40,000 tubtob 50,000 ka indibidwal halin sa probinsiya kag siyudad sang Iloilo nga matambong sang grand rally sang Alyansa para sa Bagong Pilipinas sa Mandurriao buwas, Pebrero 13.

Ini suno kay Traffic and Transportation Management Office (TTMO) Head, Ret. Col. Uldarico Garbanzos, base sa impormasyon nga nakuha niya sa coordination meeting antes ginpreparahan ang ipatuman nga traffic scheme.

Hiwaton ang grand rally sa Gaisano ICC grounds sa Mandurriao halin las-2 sa hapon.

Gin-identify bilang drop-off area sang mga matambong ang mga dalan sa Donato Pison Avenue, Jalandoni Street, kag Garden of Love sa Nabitasan, La Paz. Ini man nga mga lugar ang gin-designar nga parking areas.

Ang indi na ma-cater sa gin-designar nga parking area, pabalikon sang TTMO sa mga perimeter boundary terminals.

May ipatuman nga road closure sa porsyon sang service road sa Benigno Aquino Avenue halin las-10 buwas sa aga tungod sa aktibidad. — Aksyon Marvin Malificiar