Babaye nga nag-viral sa Facebook samtang nagagamit sang shabu madugay na nga target sang kapulisan — PDEU
ILOILO — Madugay na ang target sang kapulisan si alyas Apple, ang babaye nga nag-viral sa Facebook samtang nagagamit sang shabu.
Suno kay Police Major Dadje Delima, head sang PDEU, sadto pa naguwa ang pangalan ni Apple sa listahan sang kapulisan nga naga-operate sa Northern part sang Iloilo kag porsyon sang probinsiya sang Capiz, pero mabudlay lang siya dakpon.
Gin-athag ni Delima nga sang 2024 pa naguwa ang video ni Apple samtang nagaruro pero subong lang nag-viral sa Facebook.
Suno kay Delima, gin-ako ni Apple ang paggamit sang illegal nga druga pero ginatudlo niya ang nobya sang iya anay nobyo nga dismissed police nga amo ang nag-post sang video sa Facebook.
Matandaan gin-operate sang kapulisan si Apple pagkatapos nag-viral kag nakuhaan sang 290 grams sang suspected shabu nga nagabalor sang P1.9 million sa Zone 1, Poblacion, Estancia sang Pebrero 11.
