Patrol car sang Banate MPS lakip sa mga gin-clamp sang clearing team sang TTMO sa City Proper
ILOILO CITY — Nalakip sa mga gindalasa sang clearing team sang Iloilo City Traffic and Transportation Management Office ang patrol car sang Banate Municipal Police Station tungod naga-on road parking sa siyudad kahapon sang aga, Pebrero 18.
Suno kay TTMO Head, Retired Colonel Uldarico Garbanzos, antes gin-clamp ang patrol car may nabaton sila nga report nga may naga-on road parking sa Forbes Bridge, ang taytay nga naga-angot sang La Paz kag City Proper.
Naabtan sang clearing team nga naga-on road parking sa atubang sang opisina sang MIWD ang patrol car gani gindagdagan sang citation ticket kag gin-clamp.
Wala sang tawo sa patrol car pero tungod may nagpahibalo sa police nga yara sa Hall of Justice nga naga-operate ang TTMO, nagguwa ang police driver kag ginpalapitan ang clearing team.
Ginhulam sang TTMO personnel ang driver’s license sang police kag nag-issue sang citation ticket sa violation nga on-road parking. Gilayon man nga nagbayad sang penalidad ang police gani nakuha nila ang salakyan.
Nagapakita lang ini suno sa iya, nga wala sang may pinilian ang clearing team sa mga gina-operate nga mga naga-on road parking nga mga salakyan.
NAGPANGAYO SANG PASAYLO
Nagpangayo sang pasaylo si Police Captain Randy Lambungan, officer-in-charge sang Banate Municipal Police Station sang nalakip ang ila patrol car sa mga gin-clamp tungod sa on-road parking.
Ginpaathag ni Lambungan nga sa amo nga porsyon sang taytay gintudlo sang guard sa Hall of Justice sila puwede maka-park sang salakyan tungod wala na sang bakante sa sulod rason nga ila ginsunod.
Magluwas diri, naghingagaw man sila sa las-10 sa aga nga appointment sa piskal agud maka-file sang kaso kag wala na sila sang tiun nga magpangita sang iban nga parking area.
Ginbayran gilayon sang police ang citation ticket may kaangtanan sa on-road parking nga balor P1,000.
Nakuha man gilayon sang police ang patrol car.
“INDI KAMI GUSTO NGA MAY PINILIAN”
Wala sang pinilian ang clearing team sang Iloilo City TTMO sa mga gina-operate nga mga salakyan nga naga-on road sa siyudad.
Ini ang pahayag ni TTMO Head, Retired Colonel Uldarico Garbanzos sang lakip sa mga gin-clamp ang patrol car sang Banate Municipal Police Station tungod sa on-road parking.
Suno kay Garbanzos, may nabaton sila nga report nga may naga-on road parking sa Forbes Bridge, ang taytay nga nagaangot sang La Paz kag City Proper (atubang sang opisina sang MIWD) gani ila ginpadulungan. Naabtan sang team ang patrol car kag gindagdagan sang citation ticket kag gin-clamp.
Wala sang tawo sa patrol car pero tungod may nagpahibalo sa police nga yara sa Hall of Justice nga naga-operate ang TTMO, nagguwa ang police driver kag ginpalapitan ang clearing team.
Ginhulam sang TTMO personnel ang driver’s license sang police kag nag-issue sang citation ticket sa violation nga on-road parking.
