Pulis pilason sang gintiro sang pakaisa sang subject sa drug buy-bust operation sa Oton kagab-i; magpakaisa nakapalagyo
ILOILO — Napaslawan ang mga operatiba sang Provincial Drug Enforcement Unit (PDEU) sang Iloilo Police Provincial Office (IPPO) nga madakpan ang subject sa drug buy bust operation tungod nakapalagyo sa Sitio Tuburan, Brgy. Trapiche, Oton.
Subject sang operasyon si Alyas Mike, ginabanta naga-edad 50, residente sang nasambit nga lugar.
Suno kay PDEU Head Police Major Dadjie Delima, las-3 pa lang sang hapon nag-umpisa na ang pagtransaksyon nila sa subject tubtob nahuman mga las-7:20 na sa gab-i.
Nadakpan si Mike malapit sa ila balay. Pero sang manug-inventory na ang police sa mga recoveries, nanotisyaran nila nga may tawo sa sulod sang balay sang subject.
Ini ang nagtulod kay Police Corporal Gilbert Lingaya nga i-check.
Sang nakita niya nga may tawo sa sulod sang balay ginsulod niya kag ginlagas pero nagpalupok kag naigo si Lingaya sa kamot. Pakaisa ni Mike ang lalaki nga nagpalupok.
Suno kay Delima, nagsinggit pa si Lingaya nga may granada kag armas ang pakaisa sang subject. Diri na kag naggirinual ang mga yara sa guwa sang balay rason nga nakakita sang tion nga makapalagyo si Mike.
Ginapatihan sang police nga nagsulod sa ila balay si Mike.
Masobra tatlo ka oras nga gin-negosyar sang police ang subject nga mag-surrender pero wala sang may nagsabat. Nagbulig pa sa negosasyon si Oton Mayor Sofronio Fusin kag mga barangay officials.
Tungod wala may nagasabat, ginpwersa sang police nga sudlon ang balay ni Mike pero wala na siya nakita.
Samtang, ginhingagaw naman dala sa ospital sa siyudad si Lingaya sang kaupdanan niya nga police.
Ginpadayon sang PDEU ang inventory sang mga recoveries kag nakumpiskar ang 3 grams sang suspected shabu nga nagabalor sang P12,000. May na-recover man nga fired shell.
Yara na sa estable mga kondisyon ang police. — Aksyon Farrah Mae Morano
