2 ka estudyante napilasan sa pagpangbuno sa Molo; sinuya-ay ginalantaw nga rason sang gamo
ILOILO CITY — Napilasan ang duha ka mga estudyante sang Iloilo City National High School tungod sa pagpangbuno sa guwa sang eskwelahan kahapon, Pebrero 20.
Ang 13-anyos nga Grade 7 student may pilas sa wala nga butkon, samtang may pilas sa likod malapit sa abaga ang 17-anyos nga Grade 12 student.
Base sa imbestigasyon sang Molo police, dungan nga nagguwa sa gate sang eskwelahan ang duha ka grupo sang mga estudyante—grupo sang Grade 7 kag grupo man sang Grade 12, nagpabati-batiay kag nagsinuya-ay tubtob nagluntad ang gamo.
Antes sini, may estudyante halin sa isa ka grupo nga nagpanghangkat nga “kitaay lang kita didto sa guwa.” Pag-abot sa guwa sang eskwelahan, may natabo nga rambol malapit sa gate sang regional office sang DSWD 6 nga tabok lang sang ICNHS.
Suno kay PCapt. Ryan Christ Inot, hepe sang Molo Police Station, may nakakita nga tindera sa higad sang dalan nga may estudyante nga nagpaguwa sang kutsilyo halin sa bag, kag ang iban pa nagpaguwa man sang ila mga kutsilyo.
Pero gina-establisar pa sang Molo police kun sin-o ang una nga nagpaguwa sang kutsilyo kag kun sin-o ang una nga nabun-an.
Base man sa inisyal nga imbestigasyon sang Molo police nga miyembro sang grupo sang Grade 12 student ang nakapilas sa Grade 7 student. Wala pa mahibaluan kun sin-o naman ang nakabuno sa Grade 12 student.
Na-recover sang police ang apat ka mga kutsilyo nga gingamit sang mga estudyante.
Ginkustodiya sang police ang duha ka estudyante nga junior high school, kag tatlo ka estudyante sa senior high school. May duha nga nakapalagyo.
Gindapatan lang sang first aid ang 13-anyos, samtang yara pa sa ospital ang 17-anyos. — Aksyon Marvin Malificiar
