9 ka balay nasunog sa San Jose, Arevalo
ILOILO CITY — Naglab-ot sa ginabanta P270,000 ang balor sang kahalitan sang sunog nga nagluntad sa Purok 4, Barangay San Jose, Arevalo kagab-i, Pebrero 21.
Suno kay FO2 Jhon Paquito Verano, imbestigador sang Iloilo City Fire Station, padayon pa nga gina-imbestigaran ang ginhalinan sang kalayo.
Ginpabutyag naman ni Punong Barangay Rex Wendam nga sa balay ni Elizar Cedeño nag-umpisa ang kalayo tungod sa napabay-an nga ginaluto.
Base sa data sang Iloilo City Emergency Operations Center, siyam ka mga balay ang nasunog sa diin anum ang totally damaged kag tatlo ang partially damaged.
Sa amo nga numero, 30 ka mga indibidwal ang apektado sang sunog.
Temporaryo nga nagatiner sa chapel sang barangay ang mga nasunugan. — Aksyon Maria Kayla Tingzon
