Lalaki nga mabisita sa pasyente sa WVMC sa Mandurriao nakuhaan sang suspected shabu
ILOILO CITY — Nakuhaan sang suspected shabu ang lalaki nga mabisita sa pasyente sa Western Visayas Medical Center sa Mandurriao sang Pebrero 23.
Sa pagpangusisa sang Mandurriao police, drug surrenderer ang lalaki nga taga-San Enrique, Iloilo.
Suno kay Police Captain Joebert Amado, officer-in-charge sang Police Station 5 sa Mandurriao, nag-coordinate sila sa San Enrique police kag nagguwa nga may record may kaangtanan man sa illegal drugs ang lalaki.
Sa pagpangusisa sang police, mabisita kuntani sa pasyente sa psychiatric ward sang Western Visayas Medical Center ang lalaki.
Ginrekisa kag gin-inspect sang gwardiya ang backpack nga dala sang lalaki. Sang ginbuksan ang bulsa sang bag, nakita sang gwardiya ang isa ka plastic sachet sang suspected illegal drugs.
Gilayon nagpangayo sang bulig ang security guard sa mga doktor sa ospital kag nagpatawag sang police.
Ginpahayag ni Captain Amado nga nagpanginwala ang lalaki nga iya ang bag kag gintudlo nga ginapanag-iyahan sang iya tiyo.
Yara sa kustodiya sang Mandurriao police ang lalaki nga nagpositibo sa drug test kag natalana pasakaan sang kaso nga paglapas sa Republic Act 9165 ukon ang Comprehensive Dangerous Drugs Act of 2002.
PAHAYAG SANG WESTERN VISAYAS MEDICAL CENTER
Ginakondenar sang tagdumalahan sang Western Visayas Medical Center ang pagdala sang suspected shabu sa sulod sang ospital.
Base sa statement nga ginpaguwa sang ospital, naga-coordinate sila sa mga otoridad agud ma-imbestigaran ang natabo.
Nagpasalig ang ospital nga gina-review nila ang security protocols agud malikawan ang mga kasubong nga insidente. — Aksyon Paula Elambayo
