42-anyos nga babaye kag iya paryente nga anay soldado nadakpan sa drug buy bust sa Banate; Anay soldado nakuhaan sang pusil
ILOILO — Arestado ang 42-anyos nga babaye kag iya paryente nga anay soldado sa drug buy bust operation sa Barangay Belen, Banate kahapon sang hapon.
Suno kay Police Captain Randy Lambungan, officer-in-charge sang Banate Municipal Police Station, una na gin-subject si alyas Bek-bek kag iya bana sa buy bust operation pero nakapalagyo sila.
Liwat nga na-monitor ang babaye nga nagabaligya sang illegal nga druga gani gin-operate.
Lakip sa nadakpan si alyas Jojo, 45-anyos nga paryente ni Bek-bek kag nagaserbe nga runner sa pagbaligya sang illegal nga druga.
Sa duha ka semana nga monitoring sang police, natukiban nga sa Banate kag Anilao nakalab-ut sa pagbaligya sang illegal drugs ang subject.
Sa iya bana naman nga nagatiner sa Bakhaw, Mandurriao nagakuha sang supply sang illegal nga druga si Bek-bek.
Nakuha man kay alyas Jojo ang caliber 38 revolver nga ginpa-check na sang police sa Regional Civil Security Unit 6 kon rehistrado.
Nagsulod sa Philippine Army si Jojo sang 2001 kag nag-AWOL sa serbisyo sang 2005.
Na-recover sa mga subjects ang 17 ka sachets sang suspected shabu nga ginabanta nagabug-at sang 10 grams kag may standard drug price nga P68,000. — Aksyon Maria Kayla Tingzon
