Mga plastic scrap sa junk shop sa Calajunan, Mandurriao nasunog

ILOILO CITY—Nasunog ang duta nga may nakatampok nga gabukid sang plastic scrap sa ND junk shop sa Calajunan, Mandurriao pasado las-11 kaina sang aga.

Suno kay Calajunan barangay Kagawad Joe De Honor, nakibot na lang ang mga tinawo sang junk shop sang nagtub-ok ang maitom nga aso kag nakit-an nga ginalamon na sang kalayo ang mga plastic scrap.

Duha ang ginasunod nga anggulo sang mga tinawo sa junk shop nga ginhalinan sang kalayo—lighter nga naglupok kag nagtagas ang gas tungod sa tuman ka init, ukon ang lente sang botelya nga natuon sa papel ukon laya nga dahon.

Ginpabutyag man sang hinablos sang tag-iya nga ini na ang ikaduha nga kahigayunan nga may natabo nga sunog sa sulod sang compound sang junk shop.

Naglab-ut sa third alarm ang sunog kag masobra isa ka oras antes napalong ang kalayo. Las-12:20 sang hapon gindeklarar nga fire-out.

Ginabanta sa 300 tubtob 400 square meters sang lugar ang gintupok sang kalayo kon diin natipon ang mga plastic scrap.

Gina-imbestigaran pa sang BFP Iloilo City ang ginhalinan sang kalayo. — Aksyon Marvin Malificiar