Dinagyang choreographer Romel Flogen indi komporme sa desisyon sang IFFI nga ipadala bilang tiglawas sang Iloilo City sa Aliwan Fiesta ang Sinamba sa Regatta
ILOILO—Indi komporme ang kilala nga Dinagyang Tribes choreographer nga si Mr. Romel Flogen sa desisyon sang Iloilo Festivals Foundation, Inc. (IFFI), nga buslan sang Sinamba sa Regatta sang Paraw Regatta Festival ang Dinagyang Festival nga magarepresentar sang Iloilo City sa Aliwan Fiesta sang Manila Broadcasting Company (MBC).
Suno kay Flogen, ang indi pagpadala sang Dinagyang Festival sa Aliwan Fiesta ang magapa-untat sa pagsaysay sa kasaysayan kag kultura sang Dinagyang sa national nga lebel.
Ginpaathag niya nga ang pagpartisipar sang Dinagyang Festival sa Aliwan Fiesta ang nangin palaagyan para sa Iloilo City nga makilala tungod sa mga bisita kag turista nga nagapadulong sa siyudad.
Kon madula ang Dinagyang Festival sa Aliwan Fiesta, may epekto ini sa ekspektasyon sa numero sang mapadulong nga mga bisita kag turista sa siyudad sa tion sang kahiwatan sa masunod nga mga tinuig.
Dugang pa niya, daku nga kadulaan sa national scale ang pangalan sang Iloilo City kon indi na magpasakop sa Aliwan Fiesta tungod kada tuig nga ginabantayan ang pagpasakop sang Dinagyang Festival.
MATUOD NGA ILONGGO CULTURE ANG DAPAT NGA GINAPAKITA SA ALIWAN FIESTA
Ginpabutyag man ni Flogen nga kon desidido ang IFFI nga ipadala ang Sinamba sa Regatta sa Aliwan Fiesta, dapat pangitaan nila sang paagi nga i-angut sa Ilonggo culture ang mangin performance sang delegasyon.
Wala nakabase suno sa iya sa Ilonggo culture ang Sinamba sa Regatta kundi Latin-related ukon halin sa impluwensiya sang Espanyol nga kultura.
Suno kay Flogen, wala sang relasyon sa Ilonggo culture ang Sinamba sa Regatta nga makit-an sa Samba steps, choreography, kag costume nga halin sa mga pungsod kapareho sang Brazil.
Gin-athag ni Flogen nga pag-abot sa Aliwan Fiesta, partikular ang organizer nga dapat culture-based sang isa ka lugar ang performance kag tema sang kompetisyon, rason nga kun Sinamba sa Regatta ang ipadala, may epekto ini sa mangin resulta. — Aksyon Marvin Malificiar
