Driver sang angkar-angkar patay sang nabungguan sang SUV sa Balantang, Jaro
ILOILO CITY —Napatay samtang ginabulong sa ospital ang driver sang angkar-angkar nga nabungguan sang SUV sa Brgy. Balantang, Jaro las-11:50 kagab-i.
Ginkumpirmar ni Patrolman Kem John Pendon, traffic investigator sang Iloilo City Traffic Enforcement Unit nga napatay ang driver nga si alyas Yanyan, 26-anyos tungod sang nagkalain-lain nga pilas sa lawas.
Una na nga gin-report nga napatay sa aksidente ang 61-anyos nga babaye nga sakay sang angkar-angkar.
May minor injuries naman ang tatlo pa nga sakay sang angkar-angkar.
Sa imbestigasyon, halin sa likod sang Tagbak terminal kag nagguwa na sa highway ang angkar-angkar nga mabolante kuntani sang utanon sa Iloilo Terminal Market.
Pag-abot sang angkar-angkar sa highway, nabungguan sang SUV nga nagapakadto sa syudad ang ulihi nga porsyon sang angkar-angkar.
Ginpabutyag sang 18-anyos nga driver sang SUV nga nakita niya ang tail light sang angkar-angkar kag gintinguhaan nga magbahar pero ginalantaw nga na-miscalculate niya.
Nagtabog ang mga sakay sang angkar-angkar kag karga tungod sa impact, suno sa police. — Aksyon Farrah Mae Morano
