Driver sang motorsiklo patay sang nakabunggo kag nagsuhot sa truck sa San Enrique

ILOILO — Patay ang 19-anyos nga driver sang motorsiklo sang nakabunggo kag nagsuhot sa truck nga may karga nga tubo sa Brgy. Tambunac, San Enrique pasado las-2:00 subong nga hapon.

Suno kay PLt. Abelardo Palma, deputy chief of police sang San Enrique Municipal Police Station, papuli na sa Brgy. Cubay ang biktima sang nakabunggo sa kasugata nga truck.

Nagapataklad ang truck sa kurbadahon nga porsyon sang dalan samtang nagapadulhog ang motorsiklo.

May suksok nga helmet ang biktima suno sa police.

Gindala sa Passi City Hospital ang biktima pero gindeklarar nga dead-on-arrival.

Detained sa San Enrique police station ang driver sang truck samtang ginahulat ang desisyon sang pamilya sang biktima. — Aksyon Paula Elambayo