26 ka indibidwal nadakpan sa pauwak sa Pavia
ILOILO — 26 ka mga indibidwal ang nagkaladakpan sa pauwak sa Brgy. Pandac, Pavia kahapon, Marso 2.
Suno kay Police Lieutenant Gabriel Manguera, deputy chief sang Pavia Municipal Police Station, nakabaton sila sang report sang nagligad semana nga may nagapa-uwak sa lugar gani ila gin-monitor kag gin-operate.
Nakuha sa anti-illegal gambling operation ang bet money nga P9,100; 15 ka mga manok kag duha ka improvised ring nga ginagamit sa pauwak.
Magluwas sa mga taga-Pavia, may mga nadakpan man nga taga-Sta. Barbara, San Miguel, Leganes, Oton, kag Iloilo City.
Naga-edad 18-anyos ang pinakabata samtang 62-anyos ang pinakatigulang sa mga nagkaladakpan.
Ginpabutyag sang mga nadakpan nga ginabanta sa 100 ka mga indibidwal ang nagpusta kag nakapalagyo ang iban.
Dugang nila, nagpusta lang sila kag wala sila sang ginapanag-iyahan nga manok.
Nakasugid man ang nagkaladakpan nga kun Sabado ukon Domingo nagakatabo ang pauwak pero may mga semana man nga wala.
Natalana ipasaka buwas ang kaso nga paglapas sa Presidential Decree 1602 ukon ang anti-illegal gambling act sa mga nagkaladakpan.
Ginabanta yara sa P16,000 piyansa sa amo nga kaso suno kay Manguera. — Aksyon Paula Elambayo
