Masobra P200,000 nga balor sang kahalitan ginbilin sang sunog sa Calumpang, Molo

ILOILO CITY— Nagbilin sang P261,000 nga balor sang kahalitan ang sunog sa Zone 1 Brgy. Calumpang, Molo kahapon sang udto, Marso 4.

Ini ang base sa initial nga impormasyon sang Iloilo City Fire Station, suno kay Fire Officer 2 Earl Anthony Darroca.

Ginpahayag niya nga isa ka balay ang naupos sa sunog samtang partially damaged ang isa pa ka balay.

Gina-imbestigaran pa subong kon ano ang ginhalinan sang sunog.

Una na nga ginpabutyag sang pila ka mga residente nga ginkakibot na lang nila nga may naga-aso na sa balay kag nag-ibwal ang kalayo.

Gindala sa ospital ang pito ka tuig nga bata nga lalaki nga napaso sang nasunog ang ila balay. Base sa impormasyon sang Aksyon Radyo Iloilo, may paso sa butkon kag guya sang bata nga lalaki nga person with disability ukon PWD.

Sa pagpamangkot sang news team, nabilin sa balay ang pito ka tuig upod ang iya manghod nga apat ka tuig. Natabuan nga wala sa balay ang iloy sang mga bata pero nakahingagaw man siya pauli sang ginpahibalo sa natabo.

Ginpahayag sang mga residente nga nakabati sila sang lupok halin sa balay kag nag-ibwal ang kalayo rason nga nagkinaran-karan ang mga pumuluyo.

Nabudlayan pa sa pagsulod sang mga fire trucks sang bombero tungod sang makitid nga alagyan sa lugar. — Aksyon Farrah Mae Morano