Tiil sang driver diutayan lang mautod sang nagbungguanay ang 2 ka motorsiklo sa Lemery

ILOILO — Naghabil-habil ang tiil sang 39-anyos nga driver sang motorsiklo sang nabungguan sang isa pa ka motorsiklo sa Brgy. Poblacion South East, Lemery kahapon sang aga, Marso 3.

Suno kay Police Master Sergeant Dandy Gallego, chief investigator sang Lemery Municipal Police Station, nagapaliko pasulod sa terminal sang van sa amo nga barangay ang Rusi nga motorsiklo nga ginamaneho sang biktima.

Ginpahayag sang police nga nag-overtake ang Kawasaki Bajaj nga motorsiklo sa ginasundan nga depasahero nga jeep kag nakabunggo sa Rusi.

Tungod sa impact, nagtabog ang driver sang Rusi, ang iya live-in partner kag ang ila isa ka tuig nga bata.

Nagtabog man ang 18-anyos nga driver sang Kawasaki Bajaj kag nakaagum sang pilas sa nagkalain-lain nga parte sang iya lawas.

Gindala sa ospital sa Sara ang mga pilason samtang operahan ang driver sang Rusi. — Aksyon Paula Elambayo