Masobra P400,000 nga balor sang suspected shabu na-recover sa drug buy bust operation sa Mandurriao

ILOILO CITY — Naglab-ut sa P408,000 ang balor sang suspected shabu nga na-recover sang Police Station 10 — Station Drug Enforcement Team (SDET) sa drug buy bust operation sa Brgy. San Rafael, Mandurriao kagab-i.

Ginpahayag ni PLt. Cosmeflor Marco, deputy station commander sang PS10 nga wala sang obra ang subject nga si alyas Ben, 37-anyos nga taga-Ajuy kag temporaryo nga nagatiner sa Brgy. Pali, Mandurriao.

Tungod sini, ang pagbaligya sang illegal nga druga ang ginhimo niya nga palangabuhian suno kay Lt. Marco.

Gina-monitor na sang kapulisan ang impormasyon kon sa diin nagakuha sang supply sang illegal drugs ang subject.

Na-recover ang ginabanta sa 60 grams sang suspected shabu kay Ben nga nagabalor sang P408,000. — Aksyon Paula Elambayo