Mag-asawa nga manunudlo kag ila pito ka tuig nga bata patay sang na-trap sa nasunog nga balay sa Infante, Molo

Patay sang na-trap sa nasunog nga balay sa Infante, Molo ang magpamilya kaina sang kaagahon.

Ginkumpirmar ni Fire Inspector Virgilio Mercado, Deputy City Fire Marshal, nga nasapwan ang bangkay sang mag-asawa nga manunudlo kag ila pito ka tuig nga bata nga babaye sa kwarto sang ila balay.

Nagakup-anay pa ang bata kag ang iloy sang nakit-an. Samtang nagahapa ang amay.

Ginahibalo pa kon ano ang ginhalinan sang kalayo.

NAGAPANGAYO SANG BULIG

Ginsaysay ni Louela Agustin Gregorio nga nabatian niya ang iya kapid nga nagapangayo sang bulig samtang nagakasunog ang ila balay.

Suno kay Louela, duha ka pamilya ang naga-istar sa ila ancestral house nga may separado nga entrance.

Sa pihak naga-istar ang pamilya sang iya kapid nga si Louelyn Reyes kag bana nga si Julius.

Nagsugod suno sa iya ang kalayo sa kusina sang balay ni Louelyn.

Na-trap sa sulod sang kwarto si Louelyn, ang iya bana kag ila bata.

Nakadalagan naman si Louela paguwa sa iya kwarto kag nagtuyo pa nga buksan ang alagyan sa balay sang iya kapid apang nagdaku na ang kalayo.

Lunsay manunudlo sa Iloilo City National High School ang mag-asawa nga napatay sa sunog.

Nabatian ni Louela ang pagsinggitan sang iya kapid nga nagapangayo sang tabang tubtob amat-amat nga nadula ang ila tingog.