19-anyos nga lalaki nga ginakabig high value drug personality dakup sa drug buy bust operation sa Oton

ILOILO — Dakup ang 19-anyos nga lalaki nga ginakabig sang police nga high-value drug personality kag iya abyan sa buy bust operation sa Brgy. Poblacion East, Oton kahapon sang hapon, Marso 12.

Ginkilala ang subject kay alyas Kim, samtang ang iya abyan amo si alyas John nga gintudlo sang police nga upod sa illegal nga aktibidad.

Suno kay Police Lieutenant Colonel Abner Jordan, officer-in-charge sang Oton Municipal Police Station, nadakpan sadtu sa buy bust operation si Kim, sang menor-de-edad pa siya, upod ang iya tiyo.

Ginahimo si Kim nga runner sa pagbaligya sang illegal drugs sang iya tiyo nga preso sa BJMP- Nanga, Pototan suno sa police.

Nagdugay sang apat ka bulan ang monitoring sang police sa subject.

Nagabalor sang P476,000 ang apat ka sachets kag isa ka daku nga sachet sang suspected shabu nga na-recover sang police. — Aksyon Paula Elambayo