Lalaki patay sang ginbuno sang duha niya ka paryente sa Barotac Viejo

ILOILO — Patay ang 55-anyos nga lalaki sang ginbuno sang duha niya ka paryente sa Sitio Cagay Brgy. Rizal, Barotac Viejo pasado las-11:30 kagab-i.

Suno kay Police Major Ciriaco Esquilarga, officer-in-charge sang Barotac Viejo Municipal Police Station, naga-inum inom ang mga suspek sa lugar tungod bisperas sang barangay.

Ginpahayag sang police nga may natabo nga komosyon sa lugar antes ang insidente.

Tungod sini, ginkadtuan sang biktima ang grupo sang mga suspek kag ginpamangkot kun ano ang natabo tungod na-involved ang iya mga bisita.

Hinali lang ginbuno sang isa sa mga suspek ang biktima kag ginpulihan sang isa pa ka suspek suno sa police.

Gindala pa sa ospital ang biktima pero gindeklarar nga dead-on-arrival.

Detained sa Barotac Viejo police station ang mga suspek nga naga-edad 18-anyos kag 21-anyos. — Aksyon Paula Elambayo