Senior high school student dakup sa drug buy bust sa Lambunao

ILOILO — Dakup ang Grade 11 student sa drug buy bust operation sa Barangay Magbato, Lambunao mga la-una kahapon sang hapon.

Ginkilala ang subject kay alyas Binsoy, 18-anyos nga taga-Botong, Badiangan.

Suno kay Police Captain Jose Winston Biadog, deputy chief sang Lambunao Municipal Police Station, magluwas sa Badiangan kag Lambunao, nagalab-ot man ang subject sa Janiuay sa pagbaligya sang illegal nga druga.

Sa pagpangusisa sang police, nakasugid si Binsoy nga sa Janipaan, Cabatuan nagahalin ang supply sang illegal nga druga nga iya ginabaligya.

Base sa alegasyon sang subject, ginpabutyag ni Biadog nga mga isa pa lang siya ka bulan nga nagabaligya kag ginsugo lang siya sang iya pakaisa.

Naglab-ot sa tatlo ka semana ang monitoring sang police kay Binsoy tubtob nadakpan.

Nakuha sa subject ang tatlo ka sachets sang suspected shabu nga ginabanta nagabug-at sang 15 grams kag may estimated value nga P102,000. – Aksyon Maria Kayla Tingzon