Ajuy, Pototan kag Cabatuan may kumpirmado nga kaso sang tipdas — Iloilo Provincial Health Office

Ginkumpirmar ni Iloilo Provincial Health Office Head Maria Socorro Quiñon nga may tatlo na ka mga kaso sang measles ukon tipdas sa probinsiya.

Na-record ini sa Ajuy, Pototan, kag Cabatuan.

Ginpahayag ni Quiñon nga ang una nga kaso amo ang 31-anyos nga sales boy nga taga-Culasi, Ajuy. Unvaccinated ang pasyente kag may travel history sa Manila.

Nakitaan siya sang mga sintomas kasubong sang diarrhea, sore throat, gintubuan sang rashes sa ulo tubtob naglapta sa iya likod, kag may mga white spots sa baba.

May duha ka mga close contact ang pasyente apang wala sila nakitaan sang sintomas.

Ikaduha nga confirmed case ang 16-anyos nga estudyante nga taga-Iloilo City pero temporaryo nga nagatenir kag naga-eskwela sa Pototan.

Wala siya sang travel history apang may utod siya nga nagbakasyon sa Manila nga nakitaan sang sintomas kag ginalantaw nga nalatnan lang ang pasyente.

May anum ka mga na-identify nga close contact sa pasyente. Natubuan sila sang rashes apang wala na makuhaan sang samples tungod ulihi na gin-report.

11 ka bulan naman nga lapsag nga babaye ang ikatatlo nga kaso nga taga-Cabatuan. Wala sang travel history kag close contact ang iya ginikanan apang, isa ka dose pa lang sang bakuna ang na-inject sa pasyente.

Ginhilanat, ginsip-on kag gin-ubo, kag natubuan sang rashes ang lapsag.

Ginkumpirmar man ni Doctor Quiñon nga naka-recover kag nakaguwa na sa ospital ang mga pasyente.

Padayon ang pahanumdom sang Provincial Health Office nga kompletuhon gid ang pagbakuna sa kabataan kag likawan anay ang paglagaw sa mga lapsag sa mga matawo nga lugar ilabi na kun wala pa matapos ang iya immunization. – source | IPHO