Laptop nakuha sang ginkawatan ang classroom sa Dumangas NHS; Iban nga kwarto sa eskwelahan gintuyo man buksan

ILOILO — Nadiskubrehan nga wala na ang laptop sang maestro nga nakabutang sa lamesa sa sulod sang classroom sang Dumangas National High School sa Barangay Poblacion kahapon, Marso 18.

Suno kay Police Senior Master Sergeant Ronald Domines, imbestigador sang Dumangas Municipal Police Station, mga guard sang eskwelahan kag iban pa nga mga manunudlo nga nagbalik kaina ang nakadiskubre nga bukas na ang classroom sang ila gin-check.

Nagaguwa sa imbestigasyon sang police nga wala ginpuwersa ang pagbukas sang kandado gani ginalantaw ang posibilidad nga nalipatan siraduhan ang classroom ukon may access sa liyabe ang nagkuha.

Sa pagpangusisa sang police sa maestro, ginabilin nila sa guard ang liyabe.

Apat ka mga security guards ang nagabulos-bulos sa pagbantay sa eskwelahan pero pagkatapos sang ila nga shift nagapauli sila.

Wala naman nabatyagan sang naka-duty kagab-i ang pagpangawat nga ginalantaw kaagahon natabo.

Nakitaan man ang iban nga classrooms kag stockroom nga gintuyo man buksan ang kandado. May buho man nga nakita sa puwertahan sang canteen nga ginalantaw gintuyo man sudlon. — Aksyon Maria Kayla Tingzon