2 ka suspek sa pagpatay sa Slovak tourist sa Boracay ginapangita sang kapulisan — PRO 6
AKLAN– Ginapangita na sang police ang duha ka suspek sa pagpatay sa 23-anyos nga Slovak tourist nga nasapwan sa sulod sang abandonado nga chapel sa Boracay island sakop sang Sitio Pinaungon, Brgy. Balabag, Malay sang Marso 12.
Suno kay Police Regional Office (PRO) 6 Director PBGEN Jack Wanky, gintudlo sang 28-anyos nga si alyas Kimpoy ang duha niya ka abyan nga taga-Boracay nga amo ang may kahimuan sa krimen.
Si Kimpoy ang nadakpan sa drug buy bust operation sa Brgy. Sambiran, Malay sang Marso 14 kag preso sa Malay Municipal Police Station.
Samtang yara sa presuhan si Kimpoy suno kay Wanky, nakonsensiya siya gani nagpalapit sa police sang Marso 16 kag nag-ako nga may nahibaluan sa kamatayon sang biktima nga si Michaela Mickova.
Gin-assist si Kimpoy sang police kag ginkuhaan sang pahayag tubtob nga gin-refer sa abogado para makasulat sang iya affidavit of confession, suno kay Wanky.
Base sa panaysayon ni Kimpoy, naga-inom sila nga tatlo sang iya mga abyan sa atubang sang chapel sang Marso 10, mga las-3 sa hapon sang nag-abot ang biktima nga naga-isahanon samtang nagakuha sang litrato.
Nag-istoryahanay sila nga apat tungod mainabyanon ang babaye, suno kay Wanky.
Sang malakat na kuntani ang babaye, gin-uyatan siya sa kamot sang isa sa mga lalaki gani nagpalak siya pero ginlampusan sang isa pa ka lalaki sang kahoy sa ulo. Pagkatapos sini, gindala sang duha ang babaye sa sulod sang chapel, suno kay Kimpoy.
Wala na sang ideya si Kimpoy kon ano ang natabo sa sulod tungod ginkulbaan siya gani naglakat, suno sa police.
Marso 11 sang indi na ma-contact sang iya mga abyan si Mickova gani gin-report nga missing tubtob may naka-report sa police nga may nakit-an nga bangkay sang babaye nga wala sang panty sa sulod sang abandonado nga chapel sang Marso 12 sang hapon.
Base sa medico legal report suno kay Wanky, indi magnubo sa tatlo na ka adlaw ang bangkay sang babaye sa lugar sang nasapwan.
“MAY PATIMAAN NGA GIN-RAPE ANG BIKTIMA”
Sa autopsy result, “suggestive of sexual abuse” ang biktima, suno kay Wanky.
Napatay naman tungod sa hematoma ang babaye tungod sang paglampos sang kahoy sa iya nga ulo.
Ginahibalo pa sang kapulisan kon duha ka lalaki ang naghimulos sa biktima. Indi pa ma-establish kon ano ang nagkalatabo sa likod sang chapel sa diin gindala ang babaye.
Pagkatapos sang insidente, naglakat ang duha ka mga suspek kag nagkitaay pa sila ni Kimpoy pero wala na nila gin-istoryahan ang natabo.
Ginatutukan subong sang Special Investigation Task Group (SITG) sang Aklan Police Provincial Office ang pagpangita sang dugang nga ebidensya agud mapasakaan na sang kaso ang mga suspek. — Source: Firingline/ Aksyon Farrah Mae Morano
