Kaso nga pagpatay sa Slovak tourist sa Boracay island 99.9% na nga nasolbar — PRO 6

AKLAN–Nagapati si Police Regional Office 6 Director PBGen Jack Wanky nga 99.9% na nga nasolbar ang kaso sang pagpatay sa Slovak tourist nga nasapwan sa abandonado nga chapel sa Boracay island sakop sang Sitio Pinaungon, Brgy. Balabag, Malay sang Marso 12.

Suno kay PBGEN Wanky, nagatipon na lang sang dugang nga ebedensya ang kapulisan agud mapasakaan sang kaso ang duha ka mga suspek nga gintudlo sang testigo nga nagpatay kay Michaela Mickova.

“99.9% [na nga nagakasolbar ang kaso]. Ginahulat na lang naton ang result sang ginpadala [nga tests] sa Cebu nga crime lab,” pahayag ni Wanky.

Makabulig ang statement sang testigo nga si alyas Kimpoy sa imbestigasyon sang Special Investigation Task Group (SITG) sa kamatayon sang biktima, suno kay Wanky.

Si Kimpoy ang nadakpan sa drug buy bust operation sa Brgy. Sambiran, Malay sang Marso 14 kag nagpalapit sa police sang Marso 16 agud magpanugid nga may nahibaluan sa kamatayon sang biktima.

Gintudlo ni Kimpoy ang duha niya ka abyan nga nakaupod inom sa atubang sang abandonado nga chapel, nga amo ang suspek sa krimen.

Kon basehan ang pahayag ni Kimpoy, suno kay Wanky, consistent ini.

Nagapati naman si Wanky nga yara pa gihapon sa isla ang duha ka mga suspek nga nagatrabaho nga freelance tour guide kag naga-assist sa crystal kayak. — Aksyon Farrah Mae Morano