Barangay tanod sa Pavia nasapwan patay nga may pilas sang pagkatiro; Suspek nadakpan
ILOILO — Nasapwan nga patay kag may pilas sang pagkatiro sa lawas ang tanod sa Brgy. Amparo, Pavia sang Sabado sang gab-i, Marso 22.
Ginkilala ni Punong Barangay Andrew Almeria sang Brgy. Amparo ang lalaki kay Carmelino Minor, 52-anyos.
Ginpahayag ni Almeria nga padulong kuntani sa tanod outpost si Minor agud mag-duty sang natabo ang insidente.
May nakakita nga mga residente nga may nagakayaon sa kahilamunan rason nga nagtawag sa mga barangay officials.
Pag-abot sa lugar, nasapwan ang biktima nga nagakaya kag may igo sang bala sa wala nga parte sang dughan.
May mga residente nga nakabati sang lupok sang nadula ang supply sang kuryente sa lugar suno kay Kapitan Almeria.
Ginpabutyag ni Almeria nga wala siya sang nahibaluan nga nakontra sang biktima tungod sa iya pagkakilala, mabuot kag wala gamo si Minor.
IMBESTIGASYON SANG PAVIA POLICE
Suno kay Police Major Harold Rendora, hepe sang Pavia Municipal Police Station, personal grudge kag pagpangawat ang ginalantaw nga motibo sa krimen.
Sa pagpangusisa sang police sa pamilya, may bag ang biktima pero wala sang dala nga daku nga kantidad sang kwarta.
Wala na-recover ang bag sa crime scene.
Dugang pa ni Rendora, indi pa ma-establisar kon ano ang natabo tungod wala pa sang witness kag kon may kaangtanan sa Earth Hour ang power interruption sa lugar sang nakabati sang lupok ang mga residente.
Gina-imbestigaran pa sang Pavia police ang natabo sa barangay tanod nga dead-on-the-spot suno kay Rendora.
NADAKPAN ANG SUSPEK
Nadakpan na ang suspect sa pagpatay sa tanod la-1:30 kaina sang kaagahon. Ginkilala ni Kagawad Romar Gaborno ang suspect kay Regie Gaborno, residente sang amo nga barangay.
Suno sa kagawad, mga las-12 kaina sang tungang gab-i sang nakahibalo siya nga nadakpan na ang suspect nga iya man pakaisa kag anay tanod sa barangay.
May witness suno sa iya nga nakatudlo sang suspek.
Sa impormasyon nga nakuha sang kagawad sa balay sang suspect siya nadakpan.
Wala sang ihibalo ang kagawad sa rason sang suspect sa pagpatay sa biktima.
Base sa blotter report sang Pavia police, nakuha sa suspect ang caliber 45 pistol nga may lima ka mga bala.– Aksyon Paula Elambayo/Aksyon Maria Kayla Tingzon
