Driver sang motorsiklo patay sang nakabunggo sa awto sa Sunset Boulevard sa Arevalo
ILOILO CITY — Patay ang 57-anyos nga driver sang motorsiklo sang naaksidente malapit sa intersection sang Iloilo Sunset Boulevard sa Brgy. Sooc, Arevalo pasado kahapon, Marso 25.
Halin sa direksyon sang Oton ang salakyan samtang halin sa direksyon sang Gloryville subdivision ang motorsiklo.
Suno kay Police Senior Master Sergeant Lougen Alarcon, imbestigador sang Iloilo City Traffic Enforcement Unit, naglab-utanay ang motorsiklo kag pribado nga salakyan sa intersection.
Tungod sa impact, nagtabog ang driver kag ang motorsiklo sang pila ka metros.
Nabuka ang windshield sang pribado nga salakyan suno sa police.
Wala na naabtan sang police ang mga biktima sa lugar tungod ginhingagaw dala sa ospital.
Dead-on-arrival sa ospital ang driver sang motorsiklo nga nakaagum sang pilas sa iya lawas.
Naka-hospital arrest ang driver sang salakyan suno sa police.
Ginapreparar na sang police ang mga dokumento sa pagpasaka sang kaso tungod nagpabutyag ang pamilya sang biktima suno kay PSMS Alarcon. — Aksyon Paula Elambayo/Photos courtesy of TEU
