RoRo operations sa Dumangas kag Lapuz sayluhon sa puerto sa Fort San Pedro
ILOILO CITY—Sayluhon sa puerto sa Fort San Pedro, City Proper ang operations sang Roll-on Roll-off (RORO) port sa Dumangas nga may ruta Iloilo-Negros vice versa, kag RoRo port sa Lapuz nga may ruta Iloilo-Guimaras vice versa sa tion nga madayon kag mahuman ang gina-propose nga Port Zone Delineation (PZD) plan sang Port of Iloilo Baseport.
Sa PZD plan, i-expand ang naga-egsister nga puerto sang Fort San Pedro tubtob sa boundary sang fishing port complex.
Suno kay Mr. Alan Rojo nga Port Manager sang Port Management Office Panay-Guimaras, Philippine Ports Authority (PPA), sakop sang expansion ang pagdugang sang mga rampahan para sa RoRo vessels nga ginasunod ang standard size sang medium kag dalagkuan nga vessels.
Tukuron man diri ang dalagkuan nga mga marshalling areas agud maka-cater sang mas madamo nga containerized cargo.
Indi naman sini matandog ang operations sang Parola Wharf para sa magagmay nga mga vessels nga may ruta Iloilo-Guimaras vice versa.
Nalakip sa limitation sang proposal suno kay Rojo ang indi pagtandog sang Rotary Park area, Muelle Loney St., City Proper, kag deep sea port road.
Indi man sini matandog ang heritage area sa Fort San Pedro base sa una na ginkasugtan sang PPA kag National Historical Commission of the Philippines (NHCP).
Dugang pa ni Rojo, kon matigayon ang expansion madugang sang RoRo operations nga halin sa Palawan kag Cebu nga ruta.
Samtang, kon magsaylo na sa siyudad ang RoRo operations halin sa Dumangas, mapabilin lang didto ang operations sang mga tramping vessels.
Ang tramping vessel ukon tramp vessel amo ang cargo ship nga wala sang set sang schedule kag nagakadto lang sa diin man nga puerto sa diin may available nga cargo.
Sa regular session sang Sangguniang Panlungsod kahapon, Marso 27, gin-endorso ni Mayor Jerry Treñas sa Sangguniang Panlungsod ang pagpasar sang Resolution of No Objection (RONO) kag Resolution of Concurrence nga amo ang gamiton sang PPA nga attachment agud i-endorso sa Regional Development Council—National Economic and Development Authority (RDC-NEDA) kag sa Office of the President sa Malacañan.
Matandaan nga sang pagpadulong ni Department of Transportation (DOTr) Secretary Vivencio Dizon sa Iloilo sang Marso 8, isa ini sa iya nga marching order sa PPA agud mas mapadasig ang economic growth sang Iloilo. — Aksyon Marvin Malificiar
