Tag-iya sang gasoline station sa Estancia gin-hold up

ILOILO — Ginhold-up sang wala pa makilala nga suspek ang babaye nga tag-iya sang mini gasoline station sa Purok 4 Brgy. Daculan, Estancia las- 7:50 subong nga gab-i.

Suno kay Police Master Sergeant Dan Jerald Allanic, imbestigador sang Estancia Municipal Police Station, nagapanirado sang pwertahan sang mini gasoline station ang biktima sang may nagpalapit nga lalaki, gintayaan siya sang pusil kag nagdeklarar sang hold-up.

Pagdeklarar sang hold-up, nagsulod ang biktima kag ang suspek sa gasolinahan. Ginbuksan sang biktima ang kaha kag madasig nga nakuha sang suspek ang kwarta nga ginabanta sa P5,000.

Sang nakuha ang kwarta sa kaha, nagpalagyo sa sa likod sang gasolinahan ang suspek.

Ginabanta mga 30-anyos ang suspek base sa paglaragway sang biktima suno sa police.

Padayon nga gina-imbestigaran sang kapulisan ang natabo. — Aksyon Paula Elambayo