Iloy patay sang nagbaliskad ang ginasakyan nga tricycle sa Barotac Viejo

ILOILO — Patay ang 42-anyos nga iloy sang nagbaliskad ang ginasakyan nga tricycle sa Brgy. San Lucas, Barotac Viejo sang Marso 29.

Suno kay Police Master Sergeant Rio Dawn Candelario, imbestigador sang Barotac Viejo Municipal Police Station, nahukas ang tapaludo sa panguna nga goma sang tricycle kag naipit rason nga gulpi nagpundo ang tricycle.

Tungod sa impact, nagbaliskad ang tricycle kag nag-awas sa dalan ang iloy nga nagapungko sa unhan sang tricycle.

Gindala sa ospital ang iloy pero gindeklarar nga dead-on-arrival suno sa police.

Samtang nakaagum sang gasgas sa nagkalain-lain nga parte sang iya lawas ang 18-anyos nga bata sang biktima nga amo ang nagamaneho sang tricycle.

Halin sa Brgy. Lipata ang mag-iloy nga nag-harvest sang mais kag pakadto sa poblacion sang natabo ang aksidente. — Aksyon Paula Elambayo