Suspected shabu nga nasulod sa angpao napulutan sa Jaro plaza

ILOILO CITY — May napulutan nga pila ka sachets sang suspected shabu nga nasulod sa angpao ukon ampao sa Jaro Plaza mga las-4:30 kahapon sang hapon.

Suno kay Police Major Eduardo Siacon Jr., hepe sang Iloilo City Police Station 9, ginkakibot sang babaye nga nakapulot sang angpao nga may unod nga sachets sang ginapatihan illegal nga druga gani gin-turnover niya sa mga police nga naka-standby sa plaza.

Dugang ni Siacon, tungod bukas ang angpao, nakita gilayon sang babaye ang unod nga ginabanta lima tubtob anum ka sachets sang suspected shabu.

Sang gin-inventory, naglab-ot sa 20 gramos ang kabug-aton sang recoveries nga estimated value nga P136,000.

Ginpabutyag ni Siacon nga estilo na sang mga nagabaligya sang illegal nga druga nga i-drop ang mga items sa nakasugtan nga lugar, kuhaan sang litrato, kag i-send paagi sa Messenger sa iya katransaksyon agud mahatag ang lokasyon sa diin ini kuhaon.

Base sa pagputos sang na-recover illegal nga druga, inugbaligya ini ukon may natalana nga magkuha sa ginbinlan nga lugar suno sa police. — Aksyon Maria Kayla Tingzon