Nobyo nga nagpamahog nga ipalapta ang mga hublas nga litrato sang iya karelasyon dakup sa entrapment operation

ILOILO — Arestado ang 36-anyos nga nobyo sang nagpamahog nga ipalapta ang hublas nga litrato sang iya nobya sa Brgy. Apologista, Sara kahapon, Abril 1.

Ini ang rason nga nagpangayo sang bulig ang babaye sa Criminal Investigation and Detection Group – Provincial Field Unit kag ginpaidalom sa entrapment operation.

Suno kay Police Lieutenant Marlon Ayson, assistant provincial chief sang CIDG-PFU, nagapangayo sang kuwarta ang lalaki sa tagreklamo sa baylo nga panason niya ang mga hublas nga litrato sang babaye kag indi pag-ipost sa social media.

Nagsugod sang Pebrero subong nga tuig ang pamahog sang nobyo sa iya nobya suno kay Ayson.

Sa pagpangusisa sang police, nangin magkarelasyon ang tagreklamo kag ang lalaki sang lima ka tuig.

Magapangatubang sang kaso paglapas sa Republic Act 9995 ukon ang Anti-Photo and Video Voyeurism Act of 2009 ang nobyo. — Aksyon Paula Elambayo